هل يغني غسل الجنابة والحيض عن الوضوء؟ حكم الصلاة قبل دخول الوقت بساعتين
سؤال طرحته السائلة "حسناء" من مدينة العيون، وتجيب عنه فضيلة الأستاذة خديجة أبو زيد، عضو المجلس العلمي المحلي لعمالة الصخيرات-تمارة، وأستاذة بجامعة محمد الخامس بالرباط. المقال يحافظ على الصيغة العفوية والقريبة من المتلقي لتبسيط الأحكام الفقهية.
هل الغسل الأكبر كافٍ دون الوضوء الصغير؟
السائلة الكريمة كتقول واش الغسل، يعني تعميم الجسد بالماء من غير الوضوء الصغير، واش كافي باش الإنسان يصلي هكذا ولا ضروري أنها تتوضى؟ وقالت واحد المسألة: قبل دخول وقت الصلاة بساعتين.
نجاوب على المسألة الأولى وبعد ذلك نتمم إن شاء الله. هذه المسألة كيقولوا فيها العلماء: الإنسان اللي عليه الوصف ديال الجنابة أو الحيض والنفاس بالنسبة للنساء، إذا المرأة أو الرجل عمم جسده بالماء كاملا، بمعنى غسل الشعر دياله وخلل أصول شعره ودار الماء في الجسد دياله كامل مع الدلك، فهو يجزئ هذا، بمعنى كافي، ما يحتاجش الإنسان يدير معاه الوضوء مازال. هذاكشي علاش الإمام أبو بكر بن العربي كيقول لك: "والوضوء داخل تحت الغسل"، يعني بحال نقولوا الغسل كيجمع الكبير، والوضوء داخل تحت منه.
الفرق بين غسل الحدث وغسل النظافة اليومية
اللي دار هكذا وغسل، بطبيعة الحال مع النية ديال رفع الحدث، يصح. ماشي كنتكلموا هنا على الغسل ديال السنة أو الغسل ديال النظافة أو التبرد. لا، هذا إذا كان الإنسان غيغسل غير مثلا باش يصلي الجمعة، أولا غيغسل غير حيت كانت الحرارة وبغى يتبرد، أو النظافة اليومية اللي هو مولفها، هنا لابد أنه من بعد ما يسالي هذاك الاغتسال لابد أنه يتوضأ، يجب عليه أن يتوضأ.
ولكن الإنسان اللي غادي يرفع عليه هذاك الوصف ديال الجنابة ولا المرأة الحيض والنفاس، كيفما غسلات وعممت الجسد ديالها بالماء مع هذاك الدلك وتخليل أصول الشعر، فهذا تصح به الصلاة، يعني كافٍ يرفع الحدث الأكبر.
الطريقة الأكمل والموافقة للسنة في الاغتسال
ولكن الأكمل والموافق لسنة النبي صلى الله عليه وسلم، كيفاش يدير الإنسان يلا بغى يغتسل؟
- بطبيعة الحال النية ديال رفع هذاك الوصف ديال الجنابة أو الحيض هي الأصل.
- يبدأ الإنسان ويغسل يده ثلاثة المرات.
- ثم يغسل موضع الأذى.
- ثم يتوضأ الوضوء الصغير (الأعضاء كلها ديال الوضوء مرة واحدة).
- من بعد كياخذ الماء ويضغط به على الأصول ديال الشعر دياله.
- ثم يأخذ الماء ثلاثة المرات ويفرغه على الرأس دياله وهو كيدلك ويخلل أصول شعره.
- ثم يبدأ بالشق الأيمن دياله كله مع الدلك والموالاة (عضو مور عضو ما يخليش تيبس الأعضاء دياله).
- ثم يدير الشق الأيسر دياله كله هكذا.
هذا هو غسل النبي صلى الله عليه وسلم كيف ما وصفوه أمهات المؤمنين وكما نقله عنه أهل العلم، وهذا هو الأكمل. ولكن مع هذا كنقول للسائلة الكريمة: إذا غير الإنسان دار الجسد دياله كله بالماء ودلك مع النية ديال رفع الحدث، فكيصلي به وتصح صلاته.
حكم فك ضفائر الشعر للمرأة أثناء الغسل
بالنسبة للمرأة يلا كان عندها الضفيرة (الشعر ديالها مظفور)، واش ضروري خصها تحل هذيك الضفائر أو يكفي أنها تغسل عليها؟
بالنسبة للمرأة ولا الرجل، كيقول العلماء المرأة ما تفسخش الشعر ديالها وما تفتحش هذوك الضفائر ديالها، تخليهم على الحال ديالهم. وهذا هو توجيه أم المؤمنين عائشة رضي الله عنها لعبد الله بن عمر منين سمعته يفتي النساء ويقول: "من أرادت أن تغتسل لأجل رفع الجنابة وجب عليها أن تفتح هذيك الضفائر ديالها". فقالت له: "أفلا يأمرهن فيحلقن\!" (بمعنى يزولوا الشعر ديالهم كامل).
يكفي أن المرأة تأخذ هكذا الماء ثم تضغطه وتخلل الأصول ديال الشعر ديالها، وتأخذ ثلاثة ديال الحفنات د الماء على رأسها، دون أنها تفسخ الشعر ديالها.
المبادرة بالاغتسال وعدم تضييع وقت الصلاة
هذه المسألة مهمة، لأنه أحيانا تطهر المرأة قبل المغرب مثلا. يلا طهرت قبل المغرب فخصها تصلي الظهر والعصر (المشتركتين في وقت واحد). ذاك الوقت ديال جهد واحد أربعة د الركعات وجهد فاش غادي تعمم الجسد ديالها بالماء، يجب أن تبادر لتصلي.
النساء كيظنوا أنهم باش يغتسلوا كيخصهم يمشيو للحمام ويأخذوا ذاك الوقت الطويل. لا، إذا مشى هذاك الوصف د الحيض أو الجنابة، يجب على الإنسان أنه يبادر مباشرة يرفع عليه الحدث. المسائل اللي تعودوها في الاغتسال ديال النظافة يخليوها من بعد، لأن الوقت ديال الصلاة منين كيكون واجب ما خصوش يتأخر.
وإذا طهرت المرأة وهي في العمل ديالها وقت العصر، ويتعذر عليها استعمال الماء، تتيمم وتصلي هذيك الساعة. أولا إذا كانت خارجة ويستحيل تستعمل الماء وتعرف راسها غدخل للدار قبل المغرب بذاك القدر اللي غنقدروه ديال أربعة د الركعات مع الوقت اللي غيعمم الإنسان الجسد دياله بالماء، تبادر دير هذاك الغسل السريع وتصلي، وثم العادة ديال النظافة تديرها فيما بعد.
الاغتسال قبل دخول وقت الصلاة بساعتين
بخصوص المسألة اللي جات في السؤال: يلا غتسل الرجل ولا المرأة قبل الوقت ديال الصلاة مثلا بساعتين، واش كافي هذاك لرفع الحدث؟
نعم، إذا الإنسان اغتسل هذاك الغسل الكبير، ولم يُحدث بعد ذلك (بمعنى ما انتقدش هذاك الوضوء دياله)، فهو على وضوء ويصلي به إن شاء الله ما شاء من الصلوات حتى صلاة العشاء. الله يتقبل وبارك الله فيكم.
